اوشاقلار باغچاسي
شاعر :حبيب فرشباف
زَمي»
بير گؤزو گؤيده.
آتام نيگراندير،
آتام نيگران.
اكيبدير زمي‌سين،
مين زحمت‌ايله.
قورخور قوراقليقدان،
قورخور دولودان
منيم‌ده زميم وار،
ياشيل، يام - ياشيل
نه يئره باخيرام،
نه بولودلارا،
ايسته‌يير ياغماسين،
ايسته‌يير ياغسين.
منيم زميم هارا،
اونونكو هارا!
نه سوسوزدان يانار،
نه دولو وورار.
اونو من بيچمه‌ره‌م،
اؤلسَم آجيمدان.
اونو گؤيَرتميشم،
آغ بير كاغازدا،
ياشيل ميداديمين،
ياشيل اوجوندان.
«پاييز»
هاوا سرينله‌دي
چاتدي ياي باشا،
بوياندي طبيعت
الوان، تاماشا.
دئمك پاييز اولدو،
آچدي مدرسه،
اوشاقلار هاي - كوي‌له
باشلادي درسه.
كؤلگه‌لر اوزاندي،
گونلر قيسالدي،
گونش شعاعلارين
چارچارپاز سالدي.
اييده‌لر قيزاردي،
هئيوا سارالدي
داغلارين ديك باشين
دومانلار آلدي،
دريلدي مئيوه‌لر،
پوزولدو، باغلار،
مين رنگه بوياندي
باغدا يارپاقلار.
بولودلار، دومانلار
ياناشدي داغا
ائلاتلار اؤزقويدو
يئنه قيشلاغا.
آراندا گؤيردي
يئنه‌ده اوتلار
قويونلار، قوزولار
چيمن‌ده اوتلار
داغليق منطقه‌دير
بيزيم يئريميز.
ياناجاق فيكرينده
اولمالي‌ييق بيز.
گاهدان ياغيش ياغير،
گاهدان يئل اسير
سويو دوندورماغا
هاوا تله سير.
بير آدي «پاييز» دير،
بير آدي «گؤز» دور
بو فصله «سون باهار»
دئسك‌ده دوزدور
پاييزدا دئينده
قيشين قارداشي
آغارير پاييزدا
داغلارين باشي.
«مدرسه‌دن گلنده»
قاييداركن مدرسه‌دن
سالام وئرديم آتاما من؛
آتام دئدي: قيزيم گلدين؟
سؤيله گؤروم نه اؤيرندين؟
دئديم: آتا بير قولاق آس !
فارسلار دئيير اوراغا، داس.
اؤيرنميشم اَليف بِ يي،
اوخويورام من هر شئيي،
بو بابادير، باخ بودا آب
بوآت بو ديش، بودا جوراب؛
اؤيرنميشم بخش ائتمه‌يي،
دئييرسن‌سه، دة هر نه‌يي.
اللريم‌له پارچالارام،
سسلريني من سايارام؛
سسلر ديَجَك قولاغيما
گتيره‌رم بارماغيما.
آتام دئدي: «بو آلماني
بير پارچالا گوروم هاني؟»
آلمالاري گؤره‌ن چاغي
گتيرديم من تئز پيچاغي،
بونو گؤرجك آتام گولدو ،
ائله گولدو، ائله گولدو
گؤزلريندن ياش تؤكولدو؛
دئدي: قيزيم كلاسدا سن
ائله بئله بخش ائديرسن؟!
اؤز يئريمده دايانديم من،
آتامدان برك اوتانديم من.
«كپنك»
چيچكلرين رنگين يالار كپنك،
هر چيچكدن بير رنگ آلار كپنك.
گؤزه‌ل اولار، گويچك اولار كپنك،
اؤزوده بير چيچك اولار كپنك.
قاناديندا گيرده، گيرده خالي‌وار ،
قاراسي وار، ساريسي‌وار، آلي‌وار.
او هر يئردن باغچا- باغي چوخ سئوه‌ر ،
اوشاقلارلا اويناماغي چوخ سئوه‌ر.
اوچار، اوچار دوز چاتاندا يول اوسته
گليب قونار چيچكلي بير كول اوسته.
قانادلارين گاه اوجالدار، گاه يايار ،
كول اوستونده بير چيچگه اوخشايار.
بير اوشاق‌دا اونو گؤروب سئوينر،
گئده‌ر توتسون قلبي گوپ- گوپ دؤيونر.
بارماغي‌نين دوز اوجوندان قالخار او ،
اوشاغي‌دا يانديرار او، ياخار او.
بوردان اورا، اوردان اورا هئي اوچار،
اوشاق اونون داليسيجا هئي قاچار.
تؤوشر - تؤوشر اَلي اوزاناق قالار ،
دوروب اونون داليسيجا يالوارار:
گئتمه، گئتمه آي قانادلي چيچه‌ييم !
كوسمه مندن منيم گؤزه‌ل گؤيچه‌ييم!
قورخورام كي اودو ايشيق ساناسان،
گئديب گيريب اود ايچينده ياناسان.
شاملار آغلار سنه تؤكر گؤز ياشي،
من ده ياننام شاملار ايله ياناشي.
آياقلارين ايپكدن‌دير كپنك!
قانادلارين چيچكدن‌دير كپنك!
كاش كي سني بيرجه دفعه توتايديم ،
گيرده، گيرده خال لاريندان اؤپيديم.
يالواريرام يولون دوشسه تبريزه
بير آخشام دا يئنه فوناق گل بيزه!
«دوغوم گونون مبارك»
گؤزه‌ل بالا شمعي پوله
شيرنيني كس گوله - گوله!
بئش ياشيني وئردين باشا ،
بو گون گيردين آلتي ياشا.
موباركدير تازا ايلين،
سن عؤمور سور شيرين - شيرين!
ايل‌لر يئل تك گليب گئده‌ر،
سن عؤمرونو ائتمه هده‌ر.
هنر گؤستر، ياشا، يارات !
آرزوم بودور: آرزونا چات!
قوللوق ائتسَن سن وطنه
فخر ائده‌جك ائل‌لر سنه.
قوي سويله‌سين اوبان ائلين،
ـ موباركدير تازا ايلين!
«باهار»
باشيم اوسته گونشين
ساچاق - ساچاق تئل‌لري،
نفسيمدن گئده جك
قارين، بوزون اثري.
آياغيم آلتدا چيمن
اَتگيمده گول - چيچك،
قارانقوشلار قاييدير
ائل‌لر اولور سئوينجك.
ياغيش ياغير، گون چيخير
تاغ قورور گؤي قورشاغي،
سئل‌لر، سولار شاريلدير
دره‌لردن آشاغي.
كاروان - كاروان آغ بولوت
ماوي گؤيده دوزولور،
ديمديگيندن قوشلارين
بال نغمه‌لر سوزولور.
چيچكلرين عطريندن
فرحله نيب بير آندا،
تازا پالتار گئييرلر
طبيعت ده، انسان دا.
فروردين، ارديبهشت،
خرداد منيم اوچ آييم.
باهارام من، باهارام،
گوزه‌ل ليكده يوخ تاييم.
«ياي»
نه بولود وار، نه دومان،
ماوي گؤيده گون شاخير؛
هاوانين ايستي سيندن،
اوز - گؤزومدن تَر آخير.
دَنه دولوب سارالدي،
دالغالاندي سونبول‌لر،
آرمود، اَريك يئتيشدي،
مئيوه اولدو آغ گوللر.
ياماجلاري چيمن‌دن
ياشيل‌لاشدي داغلارين،
آغاجلاري مئيوه دن
اَلوان‌لاشدي باغلارين.
باش اَگديلر بوداقلار
قودرتينه توپراغين.
ييغيلديلار سئرچه‌لر
كؤلگه‌سينه ياپراغين،
كؤچوب گلدي ائلاتلار
قيشلاقلاردان يايلاغا،
باشلاديلار اوشاقلار
چايدا، گؤلده اوزماغا.
تير، مرداد، شهريورم،
باهار تك اوچ آيام من.
ايلين لاپ ايستي فصلي،
محصول فصلي يايام من.
باهار نغمه لري
ائلدار موغانلي- 1366
آنا وطن
"دوغما آنامسان منيم
اي مهريبان وطنيم"
عشقينده گره ك يانام
سنسن مهريبان آنام.
مني بسله ين ده سن
مني سسله ين ده سن.
"دوغما آنامسان منيم
اي مهريبان وطنيم"
تورپاغيندان گوج آلديم
شؤهرتينله اوجالديم.
سنده‌دير شان- شؤهرتيم
اي اولوي محببتيم!
"دوغما آنامسان منيم
اي مهريبان وطنيم"
نه قده‌ر كي جانيم وار
ايلي‌ييم وار، قانيم وار
سئوه‌جه‌يم سني من
لاپ اوره‌كدن اي وطن!
"دوغما آنامسان منيم
اي مهريبان وطنيم"
گؤيرچين
منيم آديم گؤيرچين
قانادلاريم چين به چين.
ماوي سما مكانيم
آغ بولوددور هر يانيم.
قارانليقدان بئزارام
گئجه‌يله يوخدور آرام.
ايسته‌رم كي هر زامان
نه چن اولا نه دومان.
سما اوزو آچيلا
دونيايا نور ساچيلا.
يئر اوزو باشدان باشا
چيچك‌له دولوب داشا.
باغلاردا گوللر اچا
دوزلرده مارال قاچا.
نغمه‌لر سوزه ديلدن
غم سيلينه كؤنولدن.
هامي سئوينه گوله
شنليك ياييلا ائله.
گونش گويده نور ساچا
آرزولاريم گول آچا.
.من‌ده گزه‌م سماني
شاقراق گؤرم هر ياني.
اوندادير كي دئيه‌رلر-
منه هر آخشام – سحر:
- اي قانادي چين به چين
آغ كؤينكلي گؤيرچين!
قاناد آچ گؤيده دولان
سن باريشيق قوشوسان!
باهار گلير
شنليك نورو تؤكولور
آل گونشين گؤزوندن
دره گولور داغ گولور
"باهار گلير" سؤزوندن؛
اري يير داغلاردا قار
اؤزون يئتيريب باهار
شنليك ائدين اوشاقلار!
چيخيبدير استيقبالا
لاله , نرگيز , بنؤوشه؛
باخ ! دوشور حالدان حالا
گوللو باغچا, سيخ مئشه؛
قوشلار ائتميره آه زار
اؤزون يئتيريب باهار
شنليك ائدين اوشاقلار!
گيئيبدير ياشيل دونون
جاوان لاشيب طبيعت
اوره يينده وار اونون
اودو سؤنمز محبت
گزير او ديار ديار
اؤزون يئتيريب باهار
شنليك ائدين اوشاقلار!
گزير تاپا سئوگيلين
ياشايالار سئوينجك؛
باهار دير گؤيچك گلين
اونا باغلاييب اوره ك؛
اولوي دير بو پاك ايلقار
اؤزون يئتيريب باهار
شنليك ائدين اوشاقلار !
قوي بيزيمده قلبيميز
سئوسين سئويلسين هر آن؛
طبيعتي سئوه ك بيز
سئو گي دن يارانير جان؛
شيرينله شير آرزولار
اؤزون يئتيريب باهار
شنليك ائدين اوشاقلار!
ياز گلسين كؤنول لره
نغمه دئسين دوداقلار؛
يول وئرمه يك كدره
سئوگيميز اولسون باهار
شنليك ائدين اوشاقلار!
قيرميزي پياله
من داغلارين قيزي يام
آل- قيرميزي دونوم وار،
قان كيمي قيرميزي يام
مني سئوه ر شن باهار.
دونوم داغ ياراشيغي
اؤزوم ياماجا بزه ك،
رنگيم گونش ايشيغي
گؤرونورم شفق تك.
آديمي بيلدينيزمي-
آي مهربان اوشاقلار !؟
قيرميزي يام قان كيمي ،
منله گؤزه لدي داغلار...
بيلمه دينيز؟
قوي دئيم :
-قيرميزي پياله يم.
باهار فصلي گلر كن
داغدا آچان لاله يم .
ياشاسين باهار
آييليبدي يئر،
هر يان گؤزه لدير.
آنا طبيعت
اؤلوبدو جنت.
هريان گول- -چيچك،
گؤزلدي ، گؤيچك؛
ياشاسين باهار !
گؤم- گؤيدور چمن؛
آچيب ياسمن.
قيزارير لاله،
آخير شلاله.
دوم- دورو آخار
جوشغون بولاقلار؛
ياشاسين باهار !
گوللرين چتري،
تورپاغين عطري،
ياشيل مئشه لر،
آيدين بير سحر،
گؤزه ل گؤيچك دي،
يوردا بزه كدي؛
ياشاسين باهار!
ياشاسين باهار !
بؤلوم :
یازار : مهدي