حيدر بابايه سلام

(١)حيدربابا ، ايلديريملار شاخاندا

سئللر ، سولار ، شاققيلدييوب آخاندا

قيزلار اوْنا صف باغلييوب باخاندا

سلام اولسون شوْكتوْزه ، ائلوْزه !
منيم دا بير آديم گلسين ديلوْزه

(٢)حيدربابا ، كهليك لروْن اوچاندا

كوْل ديبينَّن دوْشان قالخوب ، قاچاندا

باخچالارون چيچكلنوْب ، آچاندا
بيزدن ده بير موْمكوْن اوْلسا ياد ائله
آچيلميان اوْركلرى شاد ائله

(٣)بايرام يئلى چارداخلارى ييخاندا

نوْروز گوْلى ، قارچيچكى ، چيخاندا

آغ بولوتلار كؤينكلرين سيخاندا
بيزدن ده بير ياد ائلييه ن ساغ اوْلسون
دردلريميز قوْى ديّكلسين ، داغ اوْلسون

(٤)حيدربابا ، گوْن دالووى داغلاسين !
اوْزوْن گوْلسوْن ، بولاخلارون آغلاسين !
اوشاخلارون بير دسته گوْل باغلاسين !
يئل گلنده ، وئر گتيرسين بويانا

بلكه منيم ياتميش بختيم اوْيانا
 

(٥)حيدربابا ،‌ سنوْن اوْزوْن آغ اوْلسون !

دؤرت بير يانون بولاغ اوْلسون باغ اوْلسون

بيزدن سوْرا سنوْن باشون ساغ اوْلسون
دوْنيا قضوْ-قدر ، اؤلوْم-ايتيمدى
دوْنيا بوْيى اوْغولسوزدى ، يئتيمدى

(٦)حيدربابا ، يوْلوم سنَّن كج اوْلدى

عؤمروْم كئچدى ، گلممه ديم ، گئج اوْلدى

هئچ بيلمه ديم گؤزللروْن نئج اوْلدى

بيلمزيديم دؤنگه لر وار ،‌ دؤنوْم وار

ايتگين ليك وار ، آيريليق وار ، اوْلوْم وار

 (۷) حيدربابا ، ايگيت اَمَك ايتيرمز

عؤموْر كئچر ، افسوس بَرَه بيتيرمز

نامرد اوْلان عؤمرى باشا يئتيرمز

 بيزد ، واللاه ، اونوتماريق سيزلرى

گؤرنمسك حلال ائدوْن بيزلرى

(٨)حيدربابا ، ميراژدر سَسلننده

كَند ايچينه سسدن - كوْيدن دوْشنده

عاشيق رستم سازين ديللنديرنده
يادوندادى نه هؤلَسَك قاچارديم

قوشلار تكين قاناد آچيب اوچارديم
   

(٩)شنگيل آوا يوردى ، عاشيق آلماسى

گاهدان گئدوب ، اوْردا قوْناق قالماسى

داش آتماسى ، آلما ،‌ هيوا سالماسى

قاليب شيرين يوخى كيمين ياديمدا

اثر قويوب روحومدا ، هر زاديمدا

(١٠)حيدربابا ، قورى گؤلوْن قازلارى

گديكلرين سازاخ چالان سازلارى

كَت كؤشنين پاييزلارى ، يازلارى

بير سينما پرده سى دير گؤزوْمده

تك اوْتوروب ، سئير ائده رم اؤزوْمده

(١١)حيدربابا ،‌ قره چمن جاداسى
چْووشلارين گَلَر سسى ، صداسى

كربليا گئدنلرين قاداسى

دوْشسون بو آج يوْلسوزلارين گؤزوْنه

تمدّونون اويدوخ يالان سؤزوْنه

(١٢)حيدربابا ، شيطان بيزى آزديريب

محبتى اوْركلردن قازديريب

قره گوْنوْن سرنوشتين يازديريب
ساليب خلقى بير-بيرينن جانينا

باريشيغى بلشديريب قانينا
 

(١٣)گؤز ياشينا باخان اوْلسا ، قان آخماز

انسان اوْلان خنجر بئلينه تاخماز

آمما حئييف كوْر توتدوغون بوراخماز

بهشتيميز جهنّم اوْلماقدادير !

ذى حجّه ميز محرّم اوْلماقدادير !

(١٤)خزان يئلى يارپاخلارى تؤكنده

بولوت داغدان يئنيب ، كنده چؤكنده

شيخ الاسلام گؤزل سسين چكنده

نيسگيللى سؤز اوْركلره دَيَردى

آغاشلار دا آللاها باش اَيَردى

(١٥)داشلى بولاخ داش-قومونان دوْلماسين !

باخچالارى سارالماسين ، سوْلماسين !

اوْردان كئچن آتلى سوسوز اولماسين !

دينه : بولاخ ، خيرون اوْلسون آخارسان
افقلره خُمار-خُمار باخارسان

(١٦)حيدر بابا ، داغين ، داشين ، سره سى

كهليك اوْخور ، داليسيندا فره سى

قوزولارين آغى ، بوْزى ، قره سى
بير گئديديم داغ-دره لر اوزونى

اوْخويئديم‌ : « چوْبان ، قيتر قوزونى »
 

(١٧)حيدر بابا ، سولى يئرين دوْزوْنده

بولاخ قئنير چاى چمنين گؤزونده

بولاغ اوْتى اوْزَر سويون اوْزوْنده

گؤزل قوشلار اوْردان گليب ، گئچللر

خلوتليوْب ، بولاخدان سو ايچللر

(١٨)بىچين اوْستى ، سونبول بيچن اوْراخلار

ايله بيل كى ، زوْلفى دارار داراخلار

شكارچيلار بيلديرچينى سوْراخلار

بيچين چيلر آيرانلارين ايچللر

بيرهوشلانيب ، سوْننان دوروب ، بيچللر

(١٩)حيدربابا ، كندين گوْنى باتاند

اوشاقلارون شامين ئييوب ، ياتاندا

آى بولوتدان چيخوب ، قاش-گؤز آتاندا

بيزدن ده بير سن اوْنلارا قصّه ده

قصّه ميزده چوخلى غم و غصّه ده

(٢٠)قارى ننه گئجه ناغيل دييَنده

كوْلك قالخيب ، قاپ-باجانى دؤيَنده

قورد گئچينين شنگوْلوْسون يينده
من قاييديب ، بيرده اوشاق اوْلئيديم

بير گوْل آچيب ، اوْندان سوْرا سوْلئيديم
 

(٢١)عمّه جانين بال بلله سين ييه رديم

سوْننان دوروب ، اوْس دوْنومى گييه رديم

باخچالاردا تيرينگَنى دييه رديم

آى اؤزومى اوْ ازديرن گوْنلريم !

آغاج مينيپ ، آت گزديرن گوْنلريم !

(٢٢)هَچى خالا چايدا پالتار يوواردى

مَمَد صادق داملارينى سوواردى

هئچ بيلمزديك داغدى ، داشدى ، دوواردى

هريان گلدى شيلاغ آتيب ، آشارديق

آللاه ، نه خوْش غمسيز-غمسيز ياشارديق

(٢٣)شيخ الاسلام مُناجاتى دييه ردى

مَشَدرحيم لبّاده نى گييه ردى

مشْدآجلى بوْز باشلارى ييه ردى

بيز خوْشودوق خيرات اوْلسون ، توْى اوْلسون

فرق ائلَمَز ، هر نوْلاجاق ، قوْى اولسون

(٢٤)ملك نياز ورنديلين سالاردى

آتين چاپوپ قئيقاجيدان چالاردى

قيرقى تكين گديك باشين آلاردى
دوْلائيا قيزلار آچيپ پنجره

پنجره لرده نه گؤزل منظره !
 

(٢٥)حيدربابا ، كندين توْيون توتاندا

قيز-گلينلر ، حنا-پيلته ساتاندا

بيگ گلينه دامنان آلما آتاندا

منيم ده اوْ قيزلاروندا گؤزوم وار

عاشيقلارين سازلاريندا سؤزوم وار

(٢٦)حيدربابا ، بولاخلارين يارپيزى

بوْستانلارين گوْل بَسَرى ، قارپيزى

چرچيلرين آغ ناباتى ، ساققيزى

ايندى ده وار داماغيمدا ، داد وئرر

ايتگين گئدن گوْنلريمدن ياد وئرر

(٢٧)بايراميدى ، گئجه قوشى اوخوردى

آداخلى قيز ، بيگ جوْرابى توْخوردى

هركس شالين بير باجادان سوْخوردى

آى نه گؤزل قايدادى شال ساللاماق !

بيگ شالينا بايرامليغين باغلاماق !

(٢٨)شال ايسته ديم منده ائوده آغلاديم

بير شال آليب ، تئز بئليمه باغلاديم

غلام گيله قاشديم ، شالى ساللاديم
فاطمه خالا منه جوراب باغلادى

خان ننه مى يادا ساليب ، آغلادى
  

(٢٩)حيدربابا ، ميرزَممدين باخچاسى

باخچالارين تورشا-شيرين آلچاسى

گلينلرين دوْزمه لرى ، طاخچاسى

هى دوْزوْلر گؤزلريمين رفينده

خيمه وورار خاطره لر صفينده

(٣٠)بايرام اوْلوب ، قيزيل پالچيق اَزَللر

ناققيش ووروب ، اوتاقلارى بَزَللر

طاخچالارا دوْزمه لرى دوْزللر

قيز-گلينين فندقچاسى ، حناسى

هَوَسله نر آناسى ، قايناناسى

(٣١)باكى چى نين سؤزى ، سوْوى ، كاغيذى

اينكلرين بولاماسى ، آغوزى

چرشنبه نين گيردكانى ، مويزى

قيزلار دييه ر : « آتيل ماتيل چرشنبه

آينا تكين بختيم آچيل چرشنبه »
 

  (٣٢)يومورتانى گؤيچك ، گوللى بوْيارديق

چاققيشديريب ، سينانلارين سوْيارديق

اوْيناماقدان بيرجه مگر دوْيارديق ؟
على منه ياشيل آشيق وئرردى

ارضا منه نوروزگوْلى درردى
 

(٣٣)نوْروز على خرمنده وَل سوْرردى

گاهدان يئنوب ، كوْلشلرى كوْرردى

داغدان دا بير چوْبان ايتى هوْرردى

اوندا ، گؤردن ، اولاخ اياخ ساخلادى

داغا باخيب ، قولاخلارين شاخلادى

(٣٤)آخشام باشى ناخيرينان گلنده

قوْدوخلارى چكيب ، ووراديق بنده

ناخير گئچيب ، گئديب ، يئتنده كنده

حيوانلارى چيلپاق مينيب ، قوْوارديق

سؤز چيخسايدى ، سينه گريب ، سوْوارديق

(٣٥)ياز گئجه سى چايدا سولار شاريلدار

داش-قَيه لر سئلده آشيب خاريلدار

قارانليقدا قوردون گؤزى پاريلدار

 ايتر ، گؤردوْن ، قوردى سئچيب ، اولاشدى

قورددا ، گؤردوْن ، قالخيب ، گديكدن آشدى

(٣٦)قيش گئجه سى طؤله لرين اوْتاغى

كتليلرين اوْتوراغى ، ياتاغى

بوخاريدا يانار اوْتون ياناغى
شبچره سى ، گيردكانى ، ايده سى

كنده باسار گوْلوْب - دانيشماق سسى
 

 (٣٧)شجاع خال اوْغلونون باكى سوْقتى

دامدا قوران سماوارى ، صحبتى

ياديمدادى شسلى قدى ، قامتى

جؤنممه گين توْيى دؤندى ، ياس اوْلدى

ننه قيزين بخت آيناسى كاس اوْلدى

(٣٨)حيدربابا ، ننه قيزين گؤزلرى

رخشنده نين شيرين-شيرين سؤزلرى

توركى دئديم اوْخوسونلار اؤزلرى

بيلسينلر كى ، آدام گئدر ، آد قالار

ياخشى-پيسدن آغيزدا بير داد قالار

(٣٩)ياز قاباغى گوْن گوْنئيى دؤيَنده

كند اوشاغى قار گوْلله سين سؤيَنده

كوْركچى لر داغدا كوْرك زوْيَنده

منيم روحوم ، ايله بيلوْن اوْردادور

كهليك كيمين باتيب ، قاليب ، قاردادور

(٤٠)قارى ننه اوزاداندا ايشينى

گوْن بولوتدا اَييرردى تشينى

قورد قوْجاليب ، چكديرنده ديشينى
سوْرى قالخيب ، دوْلائيدان آشاردى

 سوْتى آشيب ، داشاردي

(٤١)خجّه سلطان عمّه ديشين قيساردى

ملا باقر عم اوغلى تئز ميساردى

تندير يانيب ، توْسسى ائوى باساردى

چايدانيميز ارسين اوْسته قايناردى

قوْورقاميز ساج ايچينده اوْيناردى

(٤٢)بوْستان پوْزوب ، گتيررديك آشاغى

دوْلدوريرديق ائوده تاختا-طاباغى

تنديرلرده پيشيررديك قاباغى

اؤزوْن ئييوْب ، توخوملارين چيتدارديق

چوْخ يئمكدن ، لاپ آز قالا چاتدارديق

(٤٣)ورزغان نان آرموت ساتان گلنده

اوشاقلارين سسى دوْشردى كنده

بيزده بوياننان ائشيديب ، بيلنده

شيللاق آتيب ، بير قيشقريق سالارديق

بوغدا وئريب ، آرموتلاردان آلارديق

(٤٤)ميرزاتاغى نان گئجه گئتديك چايا

من باخيرام سئلده بوْغولموش آيا

بيردن ايشيق دوْشدى اوْتاى باخچايا
اى واى دئديك قورددى ، قئيتديك قاشديق

هئچ بيلمه ديك نه وقت كوْللوكدن آشديق
   
(٤٥)حيدربابا ، آغاجلارون اوجالدى

آمما حئييف ، جوانلارون قوْجالدى

توْخليلارون آريخلييب ، آجالدى

كؤلگه دؤندى ، گوْن باتدى ، قاش قَرَلدى

قوردون گؤزى قارانليقدا بَرَلدى

(٤٦)ائشيتميشم يانير آللاه چيراغى

داير اوْلوب مسجديزوْن بولاغى

راحت اوْلوب كندين ائوى ، اوشاغى

منصورخانين الي-قوْلى وار اوْلسون

هاردا قالسا ، آللاه اوْنا يار اوْلسون

(٤٧)حيدربابا ، ملا ابراهيم وار ، يا يوْخ ؟

مكتب آچار ، اوْخور اوشاقلار ، يا يوْخ ؟

خرمن اوْستى مكتبى باغلار ،‌ يا يوْخ ؟

مندن آخوندا يتيررسن سلام

ادبلى بير سلامِ مالاكلام

(٤٨)خجّه سلطان عمّه گئديب تبريزه

آمما ، نه تبريز ، كى گلممير بيزه

بالام ، دورون قوْياخ گئداخ ائمميزه
آقا اؤلدى ، تو فاقيميزداغيلدي

قوْيون اوْلان ، ياد گئدوْبَن ساغيلدى
 

 (٤٩)حيدربابا ، دوْنيا يالان دوْنيادى

سليماننان ، نوحدان قالان دوْنيادى

اوغول دوْغان ، درده سالان دوْنيادى

هر كيمسَيه هر نه وئريب ، آليبدى

افلاطوننان بير قورى آد قاليبدى

(٥٠)حيدربابا ، يار و يولداش دؤندوْلر

بير-بير منى چؤلده قوْيوب ، چؤندوْلر

چشمه لريم ، چيراخلاريم ، سؤندوْلر

يامان يئرده گؤن دؤندى ، آخشام اوْلدى

دوْنيا منه خرابه شام اوْلدى

(٥١)عم اوْغلينان گئدن گئجه قيپچاغا

آى كى چيخدى ، آتلار گلدى اوْيناغا

ديرماشيرديق ، داغلان آشيرديق داغا

مش ممى خان گؤى آتينى اوْيناتدى

تفنگينى آشيردى ، شاققيلداتدى

(٥٢)حيدربابا ، قره كوْلون دره سى

خشگنابين يوْلى ، بندى ، بره سى

اوْردا دوْشَر چيل كهليگين فره سى
اوْردان گئچر يوردوموزون اؤزوْنه

بيزده گئچك يوردوموزون سؤزوْنه
   

(٥٣)خشگنابى يامان گوْنه كيم ساليب ؟

سيدلردن كيم قيريليب ، كيم قاليب ؟

آميرغفار دام-داشينى كيم آليب ؟

بولاخ گنه گليب ، گؤلى دوْلدورور ؟

ياقورويوب ، باخچالارى سوْلدورور ؟

(٥٤)آمير غفار سيدلرين تاجييدى

شاهلار شكار ائتمه سى قيقاجييدى

مَرده شيرين ، نامرده چوْخ آجييدى

مظلوملارين حقّى اوْسته اَسَردى

ظالم لرى قيليش تكين كَسَردى

(٥٥)مير مصطفا دايى ، اوجابوْى بابا

هيكللى ،ساققاللى ، توْلستوْى بابا

ائيلردى ياس مجلسينى توْى بابا

خشگنابين آبروسى ، اَردَمى

مسجدلرين ، مجلسلرين گؤركَمى

(٥٦)مجدالسّادات گوْلردى باغلاركيمى

گوْروْلدردى بولوتلى داغلاركيمى

سؤز آغزيندا اريردى ياغلاركيمى
آلنى آچيق ، ياخشى درين قاناردى

ياشيل گؤزلر چيراغ تكين ياناردى
 

(٥٧)منيم آتام سفره لى بير كيشييدى

ائل اليندن توتماق اوْنون ايشييدى

گؤزللرين آخره قالميشييدى

اوْننان سوْرا دؤنرگه لر دؤنوْبلر

محبّتين چيراخلارى سؤنوْبلر

(٥٨)ميرصالحين دلى سوْلوق ائتمه سى

مير عزيزين شيرين شاخسِى گئتمه سى

ميرممّدين قورولماسى ، بيتمه سى

ايندى دئسك ، احوالاتدى ، ناغيلدى

گئچدى ، گئتدى ، ايتدى ، باتدى ، داغيلدى

(٥٩)مير عبدوْلوْن آيناداقاش ياخماسى

جؤجيلريندن قاشينين آخماسى

بوْيلانماسى ، دام-دوواردان باخماسى

شاه عبّاسين دوْربوْنى ، يادش بخير !

خشگنابين خوْش گوْنى ، يادش بخير !

(٦٠)ستاره عمّه نزيك لرى ياپاردى

ميرقادر ده ، هر دم بيرين قاپاردى

قاپيپ ، يئيوْب ، دايچاتكين چاپاردى
گوْلمه ليدى اوْنون نزيك قاپپاسى

عمّه مينده ارسينينين شاپپاسى
   

(٦١)حيدربابا ، آمير حيدر نئينيوْر ؟

يقين گنه سماوارى قئينيوْر

داى قوْجاليب ، آلت انگينن چئينيوْر

قولاخ باتيب ، گؤزى گيريب قاشينا

يازيق عمّه ، هاوا گليب باشينا

(٦٢)خانم عمّه ميرعبدوْلوْن سؤزوْنى

ائشيدنده ، ايه ر آغز-گؤزوْنى

مَلْكامِدا وئرر اوْنون اؤزوْنى

دعوالارين شوخلوغيلان قاتاللار

اتى يئيوْب ، باشى آتيب ، ياتاللار

(٦٣)فضّه خانم خشگنابين گوْلييدى

آميريحيا عمقزينون قولييدى

رُخساره آرتيستيدى ، سؤگوْلييدى

سيّد حسين ، مير صالحى يانسيلار

آميرجعفر غيرتلى دير ، قان سالار

(٦٤)سحر تئزدن ناخيرچيلار گَلَردى

قوْيون-قوزى دام باجادا مَلَردى

عمّه جانيم كؤرپه لرين بَلَردى
تنديرلرين قوْزاناردى توْسيسى

چؤركلرين گؤزل اييى ، ايسيسى                              

 
(٦٥)گؤيرچينلر دسته قالخيب ، اوچاللار

گوْن ساچاندا ، قيزيل پرده آچاللار

قيزيل پرده آچيب ، ييغيب ، قاچاللار

گوْن اوجاليب ، آرتارداغين جلالى

طبيعتين جوانلانار جمالى

(٦٦)حيدربابا ، قارلى داغلار آشاندا

گئجه كروان يوْلون آزيب ، چاشاندا

من هارداسام ، تهراندا يا كاشاندا

اوزاقلاردان گؤزوم سئچر اوْنلارى

خيال گليب ، آشيب ، گئچر اوْنلارى

(٦٧)بير چيخئيديم دام قيه نين داشينا

بير باخئيديم گئچميشينه ، ياشينا

بير گورئيديم نه لر گلميش باشينا

منده اْونون قارلاريلان آغلارديم

قيش دوْندوران اوْركلرى داغلارديم

(٦٨)حيدربابا ، گوْل غنچه سى خنداندى

آمما حئيف ، اوْرك غذاسى قاندى

زندگانليق بير قارانليق زينداندى
بو زيندانين دربچه سين آچان يوْخ

بو دارليقدان بيرقورتولوب ، قاچان يوْخ
 

(٦٩)حيدربابا گؤيلر بوْتوْن دوماندى

گونلريميز بير-بيريندن ياماندى

بير-بيروْزدن آيريلمايون ، آماندى

ياخشيليغى اليميزدن آليبلار

ياخشى بيزى يامان گوْنه ساليبلار

(٧٠)بير سوْروشون بو قارقينميش فلكدن

نه ايستيوْر بو قوردوغى كلكدن ؟

دينه گئچيرت اولدوزلارى الكدن

قوْى تؤكوْلسوْن ، بو يئر اوْزى داغيلسين

بو شيطانليق قورقوسى بير ييغيلسين

(٧١)بير اوچئيديم بو چيرپينان يئلينن

باغلاشئيديم داغدان آشان سئلينن

آغلاشئيديم اوزاق دوْشَن ائلينن

بير گؤرئيديم آيريليغى كيم سالدى

اؤلكه ميزده كيم قيريلدى ، كيم قالدى

(٧٢)من سنون تك داغا سالديم نَفَسى

سنده قئيتر ، گوْيلره سال بوسَسى

بايقوشوندا دار اوْلماسين قفسى
بوردا بير شئر داردا قاليب ، باغيرير

مروّت سيز انسانلارى چاغيرير
 

(٧٣)حيدربابا ، غيرت قانون قايناركن

قره قوشلار سنَّن قوْپوپ ، قالخاركن

اوْ سيلديريم داشلارينان اوْيناركن

قوْزان ، منيم همّتيمى اوْردا گؤر

اوردان اَييل ، قامتيمى داردا گؤر

(٧٤)حيدربابا . گئجه دورنا گئچنده

كوْراوْغلونون گؤزى قارا سئچنده

قير آتينى مينيب ، كسيب ، بيچنده

منده بوردان تئز مطلبه چاتمارام
ايوز گليب ، چاتميونجان ياتمارام

(٧٥)حيدربابا ، مرد اوْغوللار دوْغگينان

نامردلرين بورونلارين اوْغگينان

گديكلرده قوردلارى توت ، بوْغگينان

قوْى قوزولار آيين-شايين  اوتلاسين

قوْيونلارون قويروقلارين قاتلاسين

(٧٦)حيدربابا ، سنوْن گؤيلوْن شاد اوْلسون

دوْنيا واركن ، آغزون دوْلى داد اوْلسون

سنَّن گئچن تانيش اوْلسون ، ياد اوْلسون
دينه منيم شاعر اوْغلوم شهريار

بير عمر دوْر غم اوْستوْنه غم قالار